This is the first in a series of Articles written in Jamaican that will appear on this page..The author of this article is Dr. Carolyn Cooper.
Dr. Cooper is a lecturer in the departmnent of Literatures in English, at the university of the West Indies.Her columns appear regularly in the Jamaica Observer from which this article was lifted.
Please send all comments and suggestions or a submission to the Webruler
Mi sari fi hear se di likl yong gyal dem naa get no gud lovin fram dem man. it griiv mi wen mi riid inna 'Star' se dem ha fi a faam laik se dem dem .lov it wen dem man dem a sex dem. De yong gyal dem se dem mek op uol iip a naiz an baal out fi mek de man dem fiil se dem a enjai it.
Aal dis taim, dem dis a ded fi de huol ting don. Dat no rait. wat a papishuo!, wat a ting eh! De gyal dem kliems se de man dem so fuul dem no nuo wat aklak a straik.
Wan dakta man ina Trinidad, wa niem Everold Hosein, a him ron wan aaganisieshan wa diil wid fambili bizniz. A dem a stodi di gyal dem sex laif. Dem chek out 112 yong gyal wa paas 17 ier an no kech 24, an wa kom fram 12 kontri ina de kyaribiyan. Mi se tingz rieli bad wid wi if a di siem stuori evriwe yu go.
De gal dem se wen dem man dem a seks dem, it kom iin laik se im no bizniz wid ar tu dat. Im ongl a luk aafta fi im uona bizniz. Im naa toch-toch op im gyal fi mek ar fiil gud, mek ar redi fi go iina it. De man dem naa wiet fi no likl juus fi bobl op. Im dis a hakl op de gyal badi. Drai-drai. Im naa heng aan fi de gyal raip op and bos we. A suoso ram an skram.
An de gyal dem se it hot dem. An a no no hot-swiit. A hot-bita. It kom iin laik se a riel-riel wok yu a du. A no laik ou de kalipso se 'worki-worki' an yu nuo se dat supouzn fi bi a nais piis a wok. disya wok a kraasiz. Bruk yu dong tu notn. Yu si fi wi Jumaika man dem a wa laik big op dem ches bout dem a luk fi di wikidis slam? Dem betta lorn se a no slam a kyari de swing. De man dem weh a go ool dem ooman, a de man dem wa nuo ou fi ool ar gud.
enniÓu, mii naa put de wool a de bliem pan di man dem. Mii fiil se de ooman dem supuozn fi taak tu de man dem an tel dem wa dem waan, wa mek dem fiil gud. Ow mï sïit, no ooman nat supuozn fi seks no man wa shi kyaan taak tu, mek im nuo ow shi fiil wen shi deh ïina bed wid im. Tong tai, stuori don.